Анонимна терористичка организација со закани по живот за обвинителот Јовески: Подготвени сме да гинеме

Јавниот обвинител на Република Северна Македонија извести дека обвинителот, Љубомир Јовески, во текот на вчерашниот ден, преку препорачана пратка експедирана од Пошта Битола на 17.1.2022 година во 10:26 часот, доби закана по неговиот живот.

Фото: Jавно обвинителство на Република Северна Македонија

Анонимната препорачаната пратка со заканата е напишана на македонски и на англиски јазик. Според писмата кои обвинителот Јовески ги објави, заканата се однесува на конкретен кривичен предмет по кој постапката е завршена во декември 2021 година, со тоа што во предметот е донесена Резолуција со која постапката е запрена, бидејќи е утврдено дека нема место за јавнообвинителско постапување.

„Само го чекаме тој точен момент за да ви го одземеме животот. Постапете веднаш ако вашата желба е да останете живи. Ние сме терористичка организација која се бори и убива за неправди и исто така сме подготвени да гинеме за неа“, наведено е во заканувачките писма што ги доби обвинителот.

Според напишаното, членовите на оваа тероростичка организација се подготвени да гинат за целите на организацијата.

Фото: Jавно обвинителство на Република Северна Македонија

Јавниот обвинител на Северна Македонија истакнува дека се залудни ваквите закани и во оваа прилика нагласува дека заканите, па дури и да се по живот, нема да го поколебаат во примената на законите и во професионалното и одговорно постапување на Јавното обвинителство.

ЈО соопшти дека пратката ќе биде доставена до Министерството за внатрешни работи заради испитување на содржината на наводите и лицето кое ја експедирало пратката.

За новинарите Горан Момировски и Драган Милосављевиќ, чие ослободување се бара во писмата испратени до Јовески до Обвинителството беше поднесена кривична пријава од Агенцијата за разузнавање во врска со наводи за безбедносни и разузнавачки структури изнесени во емисијата „Заспиј ако можеш“ емитувана на ТВ Алфа на 11 јануари 2021.

Тие кон крајот на минатата година беа повикани и да дадат исказ, но како што е наведено во денешното соопштение од Обвинителството, предметот бил запрен бидејќи надлежниот обвинител сметал дека нема место за јавно-обвинителско постапување.

Извор: МЕТА

Прочитајте повеќе

Фондацијата Метаморфозис со конкурс за годишна награда „Илија Жупаноски“ за справување со дезинформации

Ќе бидат доделени две годишни награди во две категории: Најдобар новинарски труд, односно стручен труд …