Блинкен ја предупреди Кина дека ќе следуваат санкции ако испрати воена помош за Русија

Американскиот државен секретар Антони Блинкен најави дека Вашингтон нема да се двоуми да воведе санкции за кинески компании и поединци доколку Пекинг обезбеди клучна воена помош за руските војници кои се борат во Украина, пренесува Ен-Би-Си.

За време на средбата во казахстанската престолнина Астана, Блинкен рече дека со кршењето на американските санкции кон Русија, Пекинг само ќе си создаде проблеми во односите со другите земји.

„Го гледавме ова уште од првиот ден, а причината поради која го кажав со другите колеги во администрацијата, е затоа што сме загрижени дека врз основа на информациите што ги имаме, Кина размислува да се префрли од невоената поддршка што некои од нејзините компании ѝ ја даваат на Русија, на воена, материјална поддршка, поддршка за руските воени напори во Украина“, истакна Блинкен.

Тој додаде дека САД јасно ја предупредиле Кина за импликациите и последиците од обезбедувањето таква поддршка.

„Нема да се двоумиме, на пример, да таргетираме кинески компании или поединци кои ги прекршуваат нашите санкции или на друг начин учествуваат во поддршката на руските воени напори“, додаде тој.

Соединетите држави и нивните сојузници во НАТО се обидоа да ја предупредат Кина во последниве денови, јавно изјавувајќи го верувањето дека земјата размислува да и испорача на Русија смртоносна опрема.

И покрај напорите на Кина да се прикаже себеси како неутрален миротворец во војната во Украина, планот на Пекинг да стави крај на конфликтот на Западот беше дочекан со скептицизам.

Извор: Радио Слободна Европа