Бочварски: Наша цел е да создаваме услови на континуитет на градежна експанзија во земјата

„Визијата за европска и просперитетна Северна Македонија со модерна и квалитетна инфраструктура е невозможна без соработка и поддршка од стручната и академската фела. Развојот на градежниот сектор е од особено значање за развојот на државата особено што поддржува други 25 стопански гранки“, истакна министерот за транспорт и врски Благој Бочварски обраќајки се на 20-от меѓународен симпозиум на Друштвото на градежни конструктори на Македонија.

Тој ја потенцира важноста на стручната јавност во креирањето на модерна и квалитетна инфраструктура во која започнат е процес на употреба на нови стандардизирани норми и методи.

„Повеќе од четири децении постоење на ова Друштво е само по себе показател колку е значајна нашата професија.  Велам нашата, бидејќи и јас сум дел од оваа струка и знам колкав е придонесот во создавањето на трајни вредности во општеството. И затоа нашите програмски цели е да создаваме услови на континуитет на градежната експанзија во земјата, но притоа мора да понудиме нови знаења, нови стандардизирани норми и методи кои ќе ги прилагодиме во домашната легислатива. Сакам да истакнам дека ја реализираме најголемата инвестициона политика во изградба и модернизација на инфраструктурата во Северна Македонија. Исто така започнавме најголемата реформата во градежната дејност преку која  обезбедуваме високо ниво на професионалност и стандардизација на прописите и нормите“, истакна министерот Бочварски.

Тој го потенцира значењето на Еврокодовите како нови правила за работа во градежниот сектор кој треба да започнат да се применуваат од септември следната година.

Во своето обраќање истака дека Министерството за транспорт и врски е во крајна фаза во изработка на нов Закон за градење кој ќе понуди нов развој на градежната дејност.