Горан Сугарески поднесе оставка од функцијата претседател на Надзорниот одбор на СДСМ

Како резултат на поразот кој СДСМ го доживеа на последните локални избори, поранешниот министер за транспорт и врски, директор на Царинската управа и пратеник, Горан Сугарески поднесе оставка од функцијата претседател на Надзорниот одбор на Социјалдемократскиот сојуз на Македонија.

Во оставката која Сугарески ја достави до раководството на партијата, се вели:

Почитувани,

Во знак на морална одговорност за неуспехот на локалните избори, како на локално така и на централно ниво, поднесувам оставка од функцијата претседател и член на Надзорниот одбор на СДСМ.

Извршувањето високи партиски и државни функции, покрај другото подразбира и одговорност кон граѓаните и членовите на нашата партија. Во таа насока, оставката претставува мој придонес за што побрза консолидација на партијата и што поскоро враќање на победничките патеки.

Упатувам благодарност на актуелното партиско раководство, како и на сите членови на партијата за укажаната можност да извршувам високи партиски функции, меѓу кои и последната, претседател и член на Надзорниот одбор.

Јас сум социјалдемократ, секогаш тоа и ќе бидам. Останувам верен на партијата и се ставам на располагање за било каков понатамошен ангажман.

После најавената оставка на претседателот Зоран Заев, Сугарески е првиот функционер на СДСМ кој ја напушта функцијата после неодамнешниот изборен пораз.