ПУБЛИКУМ Вистината на прво место
Утрово на 46-годишна возраст, во Мелбурн, Австралија, почина поранешниот голман на ФК „Победа“ од Прилеп и на македонската репрезентација, Гоце Груевски- Чолако.
Груевски беше дете на ФК „Победа“ и нејзин капитен во сезоните кога прилепскиот клуб ги бележеше своите најголеми клупски успеси, кои му овозможија и излез на меѓународната сцена. Покрај домашните натпреварувања, Груески од 1997 до 2000 година го бранеше голот на „Победа“ и во настапите во Купот на УЕФА против екипите на „Одра“ и Интертото купот против „Озета Дукла Тренчин“, како и на антологискиот двомеч со италијанската „Перуџа“.
Со своите одбрани во дресот на „Победа“, го заслужи и дресот на македонската фудбалска репрезентација, кој го носеше 8 пати: трипати на натпревари во квалификациите за СП во Јапонија и Ј.Кореја во 2002 година, како и на 5 пријателски натпревари во 2000 и 2001 година.
Потврда дека стануваше збор за еден од најдобрите голмани во тој период кај нас, е фактот дека Гоце Груевски го чуваше голот на нашите најдобри клубови: „Победа“, „Вардар“, „Работнички“, „Слога Југомагнат“, „Македонија ЃП“ и „Беласица“.
Во 2006 година Груески замина во Австралија, каде на почетокот беше голман, за да последните години биде тренер на голманите во најпопуларниот клуб на Македонците во Мелбурн, „Македонија Престон“, а работеше и во академијата на „Манчестер Сити“.
