Денеска во Битола, на 67-годишна возраст почина Благоја Стефановски-Баге, поранешен пратеник и министер за култура, кој во еден мандат беше пратеник и долгогодишен директор на Народниот театар-Битола.
Зад Баге стои богата професионална кариера поврзана со културниот живот во градот и државата, успеси со битолскиот театар, успешно менаџирање на фестивалите „Охридско лето“, „Војдан Черондрински“ и „Ристо Шишков“, како и репрезентативно учество во меѓународната театарска асоцијација НЕТА.
Благоја Стефановски-Баге беше директор на НТ-Битола во неговите златни години, од 1975 до 1980. Тој е заслужен за големите успеси кои овој театар ги постигна во нашата држава и во странство. Стефановски беше министер за култура од 2002 до 2006 година, а потоа го формира приватниот „Мал драмски театар“ во Битола.
Благоја Стефановски-Баге е добитник на бројни признанија и награди. Последна во низата беше минатогодишната награда на Општина Битола за животно дело „4 Ноември“.