ЈЗУ Центар за јавно здравје и Општина Прилеп ги спроведуваат редовните активности за дератизација и дезинсекција

Согласно Законот за здравствена заштита на населението од заразни болести, Советот на општина Прилеп и градоначалникот носат Програма која содржи основни превентивни мерки за здравствена заштита на населението од заразни болести, како и Одлука врз која што локалната самоуправа е обврзана да изврши задолжителна превентивна дератизација и дезинсекција на територијата на општина Прилеп.

Врз таа основа, ЈЗУ Центар за јавно здравје врши ларвицидна и адултицидна дезинсекција. Во моментов се привршува ларвицидната дезинсекција, за што е набавен современ апарат за таканаречено „ладно замаглување“. Апаратот, како што истакнува директорката на прилепскиот Центар за јавно здравје, Драгица Николоска овозможува на брз и ефикасен начин да се третираат најнепристапнте места, што е во интерес и на Центарот, но пред се’ на граѓаните на општина  Прилеп.

„Финансиските средства за дератизација и дезинсекција кои ги обезбедува Општина Прилеп, годинава се во висина од 1.250.000,00 денари, а техничката и стручната помош е на Центарот за јавно здравје. Дератизацијата и десинсекцијата претставуват сложени и систематски, долгорочни и организирани мерки, кои што се спроведуваат во неколку етапи. Дератизацијата се спроведува во две фази – пролетна и есенска, при што се поставуваат родонтицидни мамци во должината на целиот канализационен систем. На територијата на општина Прилеп има вкупно 3.750 шахти, кои се третираат двапати во текот на годината. Се третира целиот канализационен систем, со тоа што посебен акцент се става на објектите од јавен интерес: болницата, здравствениот дом, училиштата, градинките и сите отворени диви депонии “, изјави Николоска.

Основна дејност на ЈЗУ Центар за јавно здравје – Прилеп, е превентивна заштита на населението од заразни и незаразни заболувања.