Ковачевски: Со Вучиќ и Рама договоривме самит на Отворен Балкан во Охрид и саем на вино и храна во Србија

Претседателот на Владата, Димитар Ковачевски вчера имаше онлајн состанок со претседателот на Србија, Александар Вучиќ и со премиерот на Албанија, Еди Рама, посветен на идните чекори на заедничката препознаена и успешна иницијатива Отворен Балкан.

На состанокот тројцата лидери се договорија дека следниот лидерски самит на Отворен Балкан ќе се одржи во првата половина од јуни во Охрид, а на почетокот од септември заеднички ќе се организира голем туристички саем на вино и храна во Србија на кој македонските, албанските и српските производители на вино и храна ќе имаат можност да ги презентираат нивните производи на гостите од регионот и Европа.

На самитот во Охрид ќе бидат потпишани значајни договори и меморандуми за соработка во културата, туризмот и економијата. Од тие причини, на овој состанок беа присутни и министерката за култура Бисера Костадиновска Стојчевска, министерот за економија Крешник Бектеши и министерот за земјоделство, шумарство и водостопанство Љупчо Николовски.

На состанокот беше истакнато дека Отворен Балкан останува отворена за Црна Гора, Косово и Босна и Херцеговина.