Општина Крушево ја заврши имплементацијата на два големи инфраструктурни проекти од меѓуопштински карактер.
Заврши изградбата на патот од с.Борино, општина Крушево, до с.Житоше, општина Долнени, кој ги поврзува двете општини и кој во голема мера ќе ја олесни комуникацијата на жителите од двете општини.
Истовремено, завршена е и реконструкцијата на патот од с.Бучин, општина Крушево, до с.Воѓани, општина Кривогаштани, во должина од 10 километри. Проектот е имплементиран во соработка на двете општини и Јавното претпријатие за државни патишта.
„Ја подобруваме патната инфраструктура насекаде низ општината и ја поврзуваме со другите општини за полесно движење и полесна комуникација на граѓаните. Во тек се и други инфраструктурни проекти, како санацијата на локални улици, асфалтирање на патот до викенд зоната ‘Езеро’ во Крушево, реконструкцијата на три локални улици во градот, реконструкција на патот до с.Саждево и други проекти кои ги планираме за 2020 година“, изјави градоначалникот на општина Крушево, Томе Христоски.