Осум години Театар Комедија

Националната установа Театар Комедија денеска, на Светскиот ден на театарот, го заокружува својот осми роденден.

Во текот на изминатите 8 години, во Театар Комедија, кој важи за најпосетуваниот театар во земјава, поставени се вкупно 34 премиери, остварени голем број гостувања и соработки, а театарот може да се пофали и со бројни награди и признанија.

Оваа година во Театар Комедија ќе изостане вообичаената премиера на 27 март, но од институцијата велат дека, по нормализирањето на ситуацијата, актерите и целиот тим на театарот ќе бидат тука за да им ги наполнат ,,животните батерии“ на посетителите со нова енергија и надеж.

Во меѓувреме, театарот ги обезбедува со смеа своите гледачи преку нивниот онлајн репертоар – на нивниот You tube канал, каде во одредени термини се емитуваат снимки од нивни претстави.

За Денот на театарот е резервирана ,,Ах, љубов моја“, во режија на Коле Ангеловски, која е првата одиграна претстава во Театар Комедија.