Средба Ковачевски – Таравари: Владина поддршка за општините за подобар и подостоинствен живот за сите наши граѓани

Претседателот на Владата, Димитар Ковачевски денеска во Гостивар оствари кратка средба со градоначалникот на Општината Арбен Таравари.

Премиерот и градоначалникот разговараа за предизвиците со кои се соочува Општина Гостивар и за важноста на поддршката која што Владата ја дава за стабилизирање на општините во насока на успешно извршување на законските надлежности и да обезбедат квалитетни услуги за граѓаните.

Владата гради објективен, правичен, транспарентен и одржлив систем за финансиско воедначување на општините. Целта на Владата е на граѓаните да им се обезбедат квалитетни услуги и пристап до истите без разлика каде живеат. Ковачевски и Таравари на состанокот уште еднаш ги потврдија заложбите за окрупнување и здружување на сите прогресивни политички партии кои што се за пристапување на Северна Македонија во ЕУ.

Ковачевски истакна дека за Владата е најважно да обезбеди просперитетна иднина за сите граѓани, бидејќи тие заслужуваат да живеат во земја членка на ЕУ.