ПУБЛИКУМ Вистината на прво место
Пишува: Сотир Габелоски
Крушево е многу повеќе од дестинација за параглајдерство и авантура, а фестивалот на храна и култура „Taste Krusevo“, кој ќе се одржи од 27 до 29 септември, е показател дека туристичкиот потенцијал на Крушево допрва треба да се развива.
Минатата 2018 година, СОУ „Наум Наумовски – Борче“ организираше еднодневен фестивал на храна сo учесници од неколку државни училишта, универзитети и приватни субјекти, на кој беа претставени многу гастрономски специјалитети, но во прв план крушевската кујна. Оваа година фестивалот се ребрендира и проширува, а организаторите очекуваат да стане традиција.
На 27 септември започнува тридневниот „Taste Krusevo – Фестивал на хран и култура“, во чии рамки ќе има гастрономски натпревар, дегустација на крушевски специјалитети и посета на културни знаменитости. Организаторот очекува учесници не само од нашата држава, туку и соседните земји како и Унгарија.
Покрај СОУ „Наум Наумовски – Борче“, оваа година како организатори и поддржувачи се јавуваат и Општина Крушево, Агенцијата за промоција и поддршка на туризмот, Центарот за средно стручно образование, потоа When in Krusevo, Локален младински совет Крушево и „Викенд во Крушево“, како и неколку индивидуалци и млади ентузијасти од градот.
Токму овој тип на фестивал е она што треба да ја надополни туристичакта понуда на Крушево. Неретко слушаме комплименти за храната која се консумира во локалните ресторани, пицерии и хотели, а самото средно училиште е препознатливо по „производството“ на кадри од областа на угостителството. Ако го имаме во предвид развојот на Крушево во авантуристичка и целогодишна дестинација, кој е во напредна фаза, Фестивалот на храна и култура – „Taste Krusevo“ ја надополнува, пред се’, целогодишната програма и понуда на градот, но и овозможува преку натпревар и пред стотици гости да ја промовира храната и да ја раздвижи локалната економија.
Директорката на училиштето-организатор, Снежана Миленковска вели дека е жално што за крушевчани се мисли дека немаат идеи и дека им недостига креативност.
„Жално е еден град како Крушево кој има толку многу да понуди, да го перцепираат само преку неколку настани и неколку културно – историски споменици. И, навистина не е фер нашите сограѓани да мислат дека овде, во Крушево, ние крушевчани само се досадуваме, дека немаме идеи и дека единственото што можеме да го понудиме се неколкуте настани и знаменитости. Затоа, „Taste Krushevo“ треба да покаже колку ние имаме оригинални идеи, амбиции и најмногу од се’ – сопствен стил“, вели директорката на СОУ „Наум Наумовски Борче“.
Првото издание на „Taste Krusevo – Фестивал на храна и култура“, во суштина беше настан или проект инициран и имплементиран од ентузијасти, чија желба е Крушево да се раздвижи, да живее надвор од летото и да го претстави во најдобро светло.
„Бидејќи готвењето и убавата храна ми се пасија, „Taste Krushevo“ го доживувам со многу љубов и емоции. Емотивен сум, затоа што сакам да прерасне во врвен фестивал на храната и културата, кој ќе биде препознатлив не само кај нас, туку и пошироко од границите на државата. Во успешноста на фестивалот силно веруввам, бидејќи позади него стојат млади и стари ‘амбасадори’, кои силно го сакаат Крушево. Овој настан покажува дека Крушево сѐ повеќе и повеќе го добива оној културен сјај кој го заслужува“, смета Димитар Ангелкоски од здружението Аутдор Манифест – организатор на фестивалот When in Krusevo.
Членовите на Локалниот младински совет, потоа неформалната група која работи на туристичка промоција на Крушево „Викенд во Крушево“ и индивидуалците како Димитар Ангелкоски, Теано Кардула и други, се само дел од плејадата на субјекти кои го поддржуваат настанот.
Уникатно подготвената храна и културата, се дополнителен потенцијал на Крушево и, веројатно, Фестивалот на храна и култура – Taste Krusevo е настанот на кој овие туристички гранки ќе бидат истакнати, со намера тој да прерасне во традиција.
