Уапсен атентатор од Истанбул – Турција ја обвинува ПКК

Турската влада ги обвини милитантните сириски Курди за експлозијата во Истанбул во која загинаа шест лица. Уапсено е лице за кое постои сомневање дека ја поставило бомбата.

Наредбата за бомбашкиот напад во Истанбул стигнала од градот Кобани во северниот дел од Сирија, изјави утрово турскиот министер за внатрешни работи, Сулејман Сојлу. Таму  турските воени единици  во изминатите години повеќепати преземаа воени акции против сириско-курдската милиција, која владата во Анкара ја смета за терористичка организација и оружено крило на  забранетата курдска Работничка партија, ПКК.

Лицето, за кое постои сомневање дека ја поставило бомбата во истанбулската фреквентна улица Истиклал во омилен трговски кварт, допатувало од северносирискиот регион Африн, тврди Сојлу, и тоа е уапсено. На телевизиите се прикажани снимки кои покажуваат жена како остава пакет на местото на кое непосредно потоа експлодираше бомба.

Во бомбашкиот атентат во улицата во која се наоѓаат бројни продавници, кафулиња и кина и којашто е и туристички магнет во турската метропола на Босфорот, вчера (13.11.2022) беа убиени шест лица, а преку 80 се повредени. 31 од ранетите, според информации од властите, уште се наоѓаат на болничко лекување, а две лица се во критична здравствена состојба. Турските власти го опишаа нападот како терористички, а претседателот  Ердоган порача дека сите вмешани ќе бидат казнети.

Истанбул и други турски градови во минатото често беа мета на политички мотивирани напади од страна на милитантни курдски, но и исламистички групи.