Во претстојниот викенд во Крушево ќе се одржи Фестивалот на храна и култура „Taste Krusevo“

Во организација на СОУ „Наум Наумовски – Борче“, од 27 до 29 септември во Крушево ќе се одржи Фестивалот на храна и култура „Taste Krusevo“.

Во рамки на Фестивалот, ќе се одржи гастрономски натпревар на кој ќе се приготвуваат традиционални крушевски јадења, дегустација на храна и посета на културни знаменитости за учесниците, но и за сите посетители. Крушевското средно училиште очекува учество од повеќе државни средни училишта, државни универзитети и други учесници од странство.

„Знам дека настанот ќе успее особено, бидејќи имаме работа со млади од Крушево и нивниот оптимизам ме тера да дадам максимум. Дополнително, жално е еден град како Крушево кој има толку многу да понуди, да го перцепираат само преку неколку настани и неколку културно – историски споменици. Затоа, ‘Taste Krusevo’ треба да покаже колку ние имаме оригинални идеи, амбиции и најмногу од се’ сопствен стил“, вели Снежана Миленковска, директорка на СОУ „Наум Наумовски Борче“.

За градоначалникот на општина Крушево, Томе Христоски овој настан е потврда за широката понуда и туристичкиот потенцијал на Крушево.

„Имаме многу содржини во Крушево и навистина имаме што да понудиме. Ако цело лето имавме богата понуда за авантуристички спортови и чист воздух, еве сега на почеток на есента, покрај авантурата преку ‘Taste Krusevo’ на посетителите им го нудиме вкусот на нашата храна и историското богатство на културните знаменитости. Ги поканувам сите граѓани од државата и надвор од неа да го посетат Фестивалот и да ја дегустираат вкусната храна“, вели Христоски.

Како поддржувачи на овој настан се јавуваат Општина Крушево, Агенцијата за промоција и поддршка на туризмот, Центарот за средно стручно образование, Локален младински совет Крушево, When in Krusevo, Викенд во Крушево, како и многу индивидуалци, граѓани и вљубеници во Крушево, како Димитар Ангелкоски, Теано Кардула и други.