Метју Лосон: Чест ми е што зборувам македонски јазик со луѓето во оваа прекрасна земја

Како што би рекол и познатиот македонски писател Блаже Конески „јазикот е нашата татковина”, вели амбасадорот Лосон во своето видео-обраќање

Денеска, на 5 Мај се одбележува Денот на македонскиот јазик. По тој повод, британскиот амбасадор Метју Лосон објави видео на кое зборува на македонски и вели дека му е чест што има можност да го учи јазикот.

„Денес го одбележуваме Денот на македонскиот јазик. Како британски амбасадор, чест ми е што имав можност да го научам македонскиот јазик и да можам да зборувам слободно со луѓето во оваа прекрасна земја. Како што би рекол и познатиот македонски писател Блаже Конески „јазикот е нашата татковина”, вели Лосон во видеото.

Честит Ден на македонскиот јазик! Како британски амбасадор, чест ми е што имав можност да го научам македонскиот јазик и да можам да зборувам слободно со луѓето во оваа прекрасна земја. Како што би рекол и познатиот македонски писател Блаже Конески „Јазикот е нашата татковина”. pic.twitter.com/EdqqgFz2ol

— MatthewLawsonUK (@MatthewLawsonUK) May 5, 2023

Тој минатата година во октомври, положи испит за познавање на македонски јазик, ниво Ц1. За ова Лосон објави на Твитер, каде што постираше и кусо видео-обраќање во кое им порачува граѓаните да го негуваат јазикот и културата.

„Одличен почеток на неделата со сертификат за положен испит по македонски јазик. Ми претставува чест и задоволство што го учам овој прекрасен јазик“, напиша амбасадорот на Твитер.

Денот на македонскиот јазик е прогласен во чест на 5 мај 1945 година, кога тогашната народна Влада на Народна Република Македонија, ја усвоила азбуката на македонскиот јазик како официјално писмо.