Крушево: Заштеда од над 2 милиони денари за уличното осветлување

Во изминатата 2020 година, Општина Крушево заштеди над 2 милиони денари за улично осветлување. Истовремено, во споредба со лани, осветлувањето е значително подобрено со поставување повеќе сијалични места, како и со промена на уличните сијалици

Заштедата од 2.363.863 денари доаѓа по поставувањето на нови, поекономични сијалици. На територија на општина Крушево во изминатите 3 години се поставени нови линии на осветлување, особено во населените места каде што претходно немало улично осветлување.

„Во изминатите 3 години го реконструиравме уличното осветлување. Во центарот на Крушево, хотелската зона, ‘Гумење’ и други локации, поставивме лед сијалици и со тоа придонесовме за заштеда на електрична енергија. Исто така, на барање на локалното население, во населените места поставивме и нови линии на осветлување. На тој начин, и покрај зголемениот број на сијалични места, добивме поквалитетна услуга, а истовремено и заштеда од над 2 милиони денари помалку“, изјави градоначалникот на општина Крушево, Томе Христоски.