агелер

Агелер: Лажна вест е дека може да се смени преговарачката рамка со ЕУ усвоена лани

Американската амбасадорка во Северна Македонија, Анџела Агелер, денеска, 10 август, ја претстави позицијата на Вашингтон околу преговорите на Македонија со Европската унија (ЕУ), потенцирајќи дека е „лажна вест“ оти може да се смени преговарачката рамка усвоена лани летото.

Таа нагласи и дека „обврските мора да се исполнуваат“.

„Европската унија беше кристално јасна за тоа што се бара од оваа земја за да се придвижи напред кон интеграцијата и да биде целосно рамноправна членка на евро-атлантската заедница. Тоа ќе се постигне со исполнување на обврските од договорот постигнат минатото лето и со тоа да оди напред низ разните пристапни процеси. Лажна вест е тоа дека некој може да го репреговара договорот постигнат минатото лето. Тоа е лажна вести“, рече Агелер во интервју за Канал 5.

Според неа, „исто така, лажна вест е дека е можен подобар договор кој сè уште не е откриен“.

„Амбасадорот на ЕУ овде во Скопје, но и Брисел, беа многу јасни дека ова се барањата за одење напред. Така што уште еднаш, наместо да биде заглавени во историски прашања и контексти, тоа што е барање на граѓаните од политичарите кои ги избрале, е тие да работат за нивните интереси и да ја придвижат земјата кон Европската унија. Тоа е местото каде што се можностите за економски раст, образование, социјала, трговија и многу други можности постојат. И навистина искрено за надевам дека тие ќе ги направат тешки одлуки“, рече Агелер.

Таа не сакаше директно да ја коментира најавата на опозицијата дека нема да гласа за уставните измени и рече дека „тоа е веројатно прашање кое најдобро е упатено до професорот Мицкоски, кој е претседател на ВМРО-ДПМНЕ и не можам да одговорам наместо него“.

„Многу се надевам дека пратениците, лидерите и членовите на сите политички партии повторно ќе го препознаат овој клучен момент за земјата и ќе донесат одлуки кои се за доброто на граѓаните, а не во интерес на нивните политички или лични аспирации. Оваа земја може и ќе има огромна корист од членството во ЕУ и членството во широката трансатлантска заедница. И тоа е државна цел на оваа земја и речиси 80 проценти од граѓаните во оваа земја сакаат да бидат дел од ЕУ. Патот напред е многу јасен“, изјави американската амбасадорка.

Прочитајте повеќе

Полициска акција во затворот Идризово

Полициска акција во затворот Идризово

Во најголемиот затвор ,,Идризово” во Скопје, денеска биле извршени претреси. Од обвинителството ја потврдуваат акцијата, …