На последниот тренинг одржан на крајот на минатата година, со пригодна свеченост џудо клубот „Сеишин“ од Прилеп ги прогласи најдобрите натпреварувачи за 2018 година и им додели награди.
Листата на најдобри натпреварувачи по категории на ниво на клубот за 2018 година, изгледа вака:
Ветерани: Киро Здравески, Маке Спиркоски и Ацо Божиноски.
Сениори: Христијан Ѓураков
Јуниорки: Александра Најдоска
Јуниори: Марио Цинцароски
Кадетки: Теодора Димеска
Кадети: Јован Најдоски
Пионерки: Леона Настоска
Пионери: Андреј Трајковски
Помлади пионерки: Теа Настоска
Помлади пионери: Никола Магдески
Деца девојчиња: Анастасија Кузманоска
Деца момчиња: Борис Џагадуроски
За најуспешен натпреварувач на „Сеишин“ за 2018 година, е прогласен Јован Најдоски.
Во натпреварувачката 2018 година, џудо клубот „Сеишин“ од Прилеп зеде учество на вкупно 8 Државни првенства, каде освои 74 медали. На 10 меѓународни турнири освоени се 78 медали, а на три Балкански првенства на кои членови на клубот ги бранеа боите на репрезентацијата на Македонија, освоени се 7 медали. Или вкупно, во минатата година џудистите на „Сеишин“ освоија вкупно 159 медали.
Најзначајни успеси се освоеното 2 место на Христијан Ѓураков и 3 место на Александра Најдоска на Балканското првенство за сениори. На истото првенство, репрезентацијата на Македонија го освои 2 место, при што репрезентативните бои ги бранеа петмина џудисти на „Сеишин“: Христијан Ѓураков, Марио Тошески, Кристијан Тошески, Бобан Глигуроски и Александра Најдоска.
Минатата 2018 година, клубот организираше две Државни првенства, еден меѓународен турнир, еден меѓународен џудо камп за пионери, како и манифестацијата „Европска недела на спортот“.
Во годината што измина, за посебни заслуги од областа на спортот, џудо клубот „Сеишин“ беше добитник на наградата „3.Ноември“ која ја доделува Општина Прилеп, а ги одбележа и двата јубилеја: 15 години од формирањето на клубот и 10 години од Меѓународниот турнир „Прилеп Град Херој“, кој стана препознатлив во балкански рамки.