НУ Театар Комедија заедно со Општина Аеродром, го реализираат Фестивалот на комедијата ,,Гола месечина“. На последното издание на Фестивалот кое се одржа во септември 2019 година, за прв пат беше воведена и наградата за животно дело „Анче Џамбазова“, во чест на една од нашите најголеми актерки, која важеше и за мајстор на комедијата. Управата на театарот и Општина Аеродром предводена од градоначалникот Златко Марин, донесоа одлука да биде снимен и документарен филм за Анче Џамбазова, кој имаше своја премиера во рамките на „Гола месечина 2019“.

Градоначалникот Марин и директорот на Театар Комедија, по одржаниот работен состанок преку видео врска, одлучија документарниот филм за Џамбазова да биде прикажан и пред пошироката јавност, односно да биде емитуван онлајн на 4 април, сабота, со почеток во 20 часот на You Tube каналот, на кој се емитуваат претставите на Театар Комедија.

Филмот е финансиски поддржан од средствата наменети за одржување на Фестивалот, обезбедени од страна на Општина Аеродром. Режисер на документарниот филм е Миле Гроздановски, а сценарист и асистент на режија, Гоце Трајковски.