Горивата со нови цени: Еуросупер БС-95 по 110 денари за литар, дизелот скокна на 102 денари

Регулаторната комисија за енергетика и водни услуги донесе одлука со која се врши зголемување на малопродажните цени на нафтените деривати во просек за 1,3 отсто. Бензинот Еуросупер БС-95 и Екстра лесното масло за домаќинство од ноќеска поскапуваат за 1 денар за литар, додека додека малопродажната цена на бензинот Еуросупер БС-98 се зголемува за половина денар за литар. Малопродажната цена на Еуродизел (Д-Е V) се зголемува за 2 и пол денари за литар.

Со најновото поскапување, од ноќеска Еуросупер БС-95 ќе се продава за 110 денари за литар, додека Еуросупер БС-98 ќе чини 112 денари за литар. Возачите ќе можат набават дизел на бензинските пумпи по цена од 102 денари за литар, додека екстра лесното масло за домаќинство ќе чини 99,5 денари за литар.

Малопродажната цена на Мазутот М-1 НС, се зголемува за 0,868 денари за килограм и сега ќе изнесува 55,508 ден/кг.

Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,179 отсто, кај дизелот за 1,697 отсто, кај екстра лесното масло за 1,673 отсто и кај мазутот зголемувањето е за 0,482 отсто.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,009 отсто.