ПУБЛИКУМ Вистината на прво место
Холандскиот десничарски политичар Герт Вилдерс вети дека ќе ја „врати земјата на Холанѓаните“, откако излезните анкети покажаа дека неговата Партија на слободата (ПВВ) ќе освои најмногу места на парламентарните избори.
„Ќе мораме да најдеме начини да ги оправдаме надежите на нашите гласачи, да ги вратиме Холанѓаните на прво место“, рече тој на прес-конференцијата, јави Танјуг, повикувајќи се на Ројтерс. Вилдерс изјави дека сега е време партиите да бараат договори.
„Не можеме да бидеме игнорирани“, порача Вилдерс.
Надминувајќи ги сите предвидувања, популистичката Партијата на слободата на Вилдерс ќе освои 37 места во 150-члениот парламент, 12 повеќе од нејзиниот најблизок ривал, коалицијата на лабуристите и зелената левица на поранешниот еврокомесар Франс Тимерманс, покажуваат најновите излезни анкети. Предноста на ПВВ е далеку поголема од очекуваното. Партијата на премиерот во заминување Марк Руте, конзервативната ВВД, е на трето место со 24 пратенички места.
Досега владејачката коалиција ја сочинуваа ВВД, Демократите 66 (Д66), Христијанско-демократската Апел (ЦДА) и Христијанската унија (КУ), која имаше 77 места во Претставничкиот дом.
Според излезните анкети, овие партии на овие избори заедно освоиле 41 мандат.
Многу партии претходно најавија дека нема да влезат во коалиција со Вилдерс, па сѐ уште не е јасно кој ќе ја формира новата влада и сѐ ќе зависи од постизборните коалиции.
Лидерката на ВВД, Дилан Јешилгоз-Зегериус, направи преседан велејќи дека ќе соработува со Вилдерс доколку нејзината партија освои најмногу гласови, иако таа ја отфрли можноста да го поддржи Вилдерс за премиер доколку освои најмногу гласови.
Овие избори ќе стават крај на 13-годишното владеење на поранешниот премиер Марк Руте, кој не се кандидираше за функцијата.
