Иран го минимизира влијанието на пријавениот воздушен напад на Израел

Техеран го минимизираше обемот и влијанието на пријавениот наводен израелски напад врз цели во Иран, што се чинеше дека е одмазда за воздушниот напад што Исламската Република го спроведе минатиот викенд врз својот заколнат непријател.

Израел не го коментираше извештајот.

Но, иранскиот министер за надворешни работи Хосеин Амир-Абдолахиан изјави за американскиот медиум NBC News дека Техеран го истражува инцидентот, но дека не видел никакви индикации дека нападот е поврзан со Израел.

Тој предупреди дека доколку Израел повторно нападне, Иран ќе одговори веднаш и „на максимално ниво“.

„Ако Израел возврати, тогаш ние ќе одговориме. Но, ако не, тогаш сме готови“, изјави Амир-Абдолахиан за NBC News на персиски јазик доцна на 19 април.

Тој додаде дека нема знаци кои ќе докажат дека оваа акција е дело на Израел.

„Тие [дроновите] полетаа од внатрешноста на Иран, летаа неколку стотици метри и потоа беа соборени, беа погодени од нашата воздушна одбрана.

Не е ни докажано дека има врска меѓу нив и Израел“, рече Амир-Абдолахиан преку ирански официјален преведувач.

Извор: РСЕ