ПУБЛИКУМ Вистината на прво место
Меѓународната организација на трудот (МОТ), која е дел од Обединетите нации, проценува дека 2,4 од 3,4 милијарди работници во светот се веќе изложени на прекумерна топлина во одреден момент од нивното работно време
Според извештајот на Обединетите нации, климатските промени веројатно ќе донесат ризици по безбедноста и здравјето на повеќе од 70 отсто од светската работна сила, пренесе германската новинска агенција ДПА.
Меѓународната организација на трудот (МОТ) вчера оцени дека се заканува „коктел од опасности“.
МОТ, која е дел од ОН, проценува дека 2,4 од 3,4 милијарди работници во светот се веќе изложени на прекумерна топлина во одреден момент од нивното работно време. Ова особено се однесува на луѓето кои работат во земјоделството или имаат други занимања на отворена средина.
Според организацијата, речиси 19.000 луѓе годишно умираат од ефектите на прекумерната топлина за време на работата. Најголема опасност е топлината и УВ зрачењето.
Работењето за време на екстремни временски услови е исто така проблем, на пример за рибарите, но и за работниците за итни случаи и тимовите за чистење пo претрпени катастрофи.
Луѓето кои работат на отворено исто така се повеќе изложени на ризик од паразити кои се шират на поголеми области поради климатските промени.
Врската помеѓу климатските промени и одредени болести е веќе препознаена, како што се ракот на кожата, кардиоваскуларни или респираторни заболувања, како и макуларна дегенерација, која може да доведе до губење на видот.
МОТ ја пофали Германија за прописите кои бараат од работодавците да обезбедат заштитна облека поради ризикот од УВ зрачење и за лекување на некои форми на рак на кожата.
„Јасно е дека климатските промени веќе предизвикуваат значителни дополнителни здравствени ризици за работниците“, изјави Манал Ази од МОТ.
Извор: МЕТА
