МВР во акција против криминална група што продавала дрога во Штип, Кочани, Берово и Виница

Вчера утрото повеќе полициски оддели, вклучувајќи ги и специјалната единица Тигри извршиле акција против организирана криминална група која е осомничена дека со помош на полицаец од ОВР Берово, продавала марихуана, кокаин и амфетамин во Штип, Кочани, Берово и Виница.

Уапсени се осуммина, Б.И. (38) од с. Грдовци, Н.Ј. (49) од с. Чифлик, К.М. (37) од Кочани, К.К. (44) од с. Чифлик, Г.А. (43) од Виница, Х.М. (22) од с. Банско, С.П. (35), како и полицискиот службеник А.К. (38) од Берово.

„Криминалната група подолг период работела на препродажба на наркотични дроги на овие подрачја и имала логистичка поддршка од полициски службеник од ОВР Берово, кој им помагал со давање информации“, соопшти МВР.

Вчера со судска наредба биле извршени претреси на осум локации на наведените подрачја.

„Кај лицето Б.И.(38) од с.Грдовци биле пронајдени околу 10 килограми марихуана, амфетамин, дигитална вага, повеќе мобилни телефони и патничко возило кое го користеле за препродавањето на дрогата. Кај лицето Н.Ј.(49) од с.Чифлик била пронајдена марихуана. Кај К.М.(37) од Кочани била пронајдена марихуана и мобилни телефони. Претреси биле извршени и кај лицата К.К.(44) од с.Чифлик, Г.А.(43) од Виница, Х.М.(22) од с.Банско и С.П.(35), кај кого биле пронајдени марихуана, кокаин и дигитална вага. Исто така, во координација со Одделот за внатрешна контрола, криминалистички истраги и професионални стандарди, бил извршен претрес и во домот на полицискиот службеник А.К.(38) од Берово и биле одземени три мобилни телефони и два компјутери“, соопшти МВР.

Полицијата најави дека ќе поднесе соодветни кривични пријави.

Оттаму додаваат дека веќе се обезбедени докази и биле запленети марихуана и амфетамин за што кривично се процесуирани две лица во Скопје и едно во Виница, кои издржуваат мерка притвор.