На Олимп, Грција, загина македонски планинар

15.09.2019 Македонија

Планинар од Македонија го загуби животот на планината Олимп во Грција, откако паднал во провалија. Неофицијално, на планинарот чиј идентитет не е соопштен, претходно му се слошило што било причина за неговиот пад во провалијата. Обдукцијата дополнително ќе ги утврди точните причини за смртта.

Според информациите на МИА, станува збор за група од околу девет лица од нашата земја, кои планинареле на Олимп.

Во пренесувањето на телото од местото на несреќата во планинарскиот дом „Спилиос Агапитос“, што се наоѓа на надморска височина од 2.100 метри интервенирале 14 пожарникари од специјалната спасувачка единица и противпожарната служба од Литохоро.