Наместо „Северна“ и „Македонија“, Сиљановска Давкова сега употребува „нашата држава“ и „нашата земја“

Во денешното соопштение од претседателскиот кабинет на Гордана Сиљановска Давкова по повод посетата во Ватикан Папата Франциск, повторно не се употребува уставното име на државата, но не се употребува ниту „Македонија“. Единствените термини што се користат се „нашата држава“ и „нашата земја“.

„Таа истакна дека историската посета на Папата Франциск на нашата земја остави силна трага во билатералните односи и го потврди високиот степен на доверба и пријателство меѓу двете држави“, се вели во соопштението.

Понатаму се додава:

„Претседателката Сиљановска Давкова и Папата Франциск ги разгледаа можностите за унапредување на институционалната соработка во областа на образованието, науката и културата и разменија мислење за тековните предизвици со кои се соочува католичката заедница во нашата држава“.

„Посочувајќи дека во нашата земја постои традицијата на почит кон различностите и висока свест за позитивната улога на религијата во развојот на општеството, претседателката го потенцираше значењето и придонесот на католичката црква и ја изрази нејзината подготвеност за продолжување на соработката со католичката заедница“.

„Претседателката изрази уверување дека за време на нејзиниот мандат нашата држава уште поинтензивно ќе се залага за продлабочување на севкупните односи со Светиот Престол, со цел јакнење на партнерството и негување на меѓусебното почитување базирано на заедничките историски, културни и верски традиции“.

Сиљановска Давкова при инагуарацијата не го користеше уставното име на државата, потег што предизвика жестоки реакции пред сè од Грција, но и од целата меѓународна заедница која повика на почитување на Преспанскиот договор.

МИЦОТАКИС: ДА СЕ ПОЧИТУВА ДОГОВОРОТ ОД ПРЕСПА БИДЕЈЌИ СКОПЈЕ Е ИЗОЛИРАНО, А НЕ ГРЦИЈА

Од кабинетот на новата претседателка подоцна се огласија со тврдење дека „во своите јавни настапи, македонската претседателка има право да го употребува името Македонија, како чин на лично право на самоопределување и самоидентификација, почитувајќи ги основните човекови права и слободи, и согласно европските вредности и начела.

„Претседателката Гордана Сиљановска Давкова ќе се придржува до официјалната примена на уставното име“, стоеше во соопштението на претседателскиот кабинет.

Извор: МЕТА