ПУБЛИКУМ Вистината на прво место
Претседателот Стево Пендаровски денеска го прими специјалниот претставник и координатор на Центарот за глобален ангажман на американскиот Стејт департмент, Џејмс Рубин.
Како што соопштија од претседателскиот Кабинет, Пендаровски и Рубин разговараа за напорите и начините за справување со дезинформациите и нивното влијание врз развојот на демократските процеси на глобално ниво.
Македонскиот претседател за време на средбата оцени дека дезинформациите имаат потенцијал да влијаат врз крупни политички и граѓански процеси и поради тоа се една од приоритетните закани за националната безбедност на многу држави. Во таа насока ја нагласил и потребата од постојано вложување во ресурси и вештини за нивно препознавање и разобличување, но и создавање на национални стратегии за опсежен одговор на дезинформациите.
„Претседателот ја истакна посветеноста на Северна Македонија да продолжи активно да работи за јакнење на отпорноста кон дезинформациите, превенирање и намалување на штетните влијанија, вклучувајќи ја отпорноста на кампањите на дезинформации што имаат за цел да поттикнуваат антизападно расположение кај македонските граѓани, и да заговараат нејасни алтернативи на европските интеграции“, се вели во соопштението на Кабинетот на Претседателот.
