Пожар во катедралата Нотр Дам во центарот на Париз

Пожар избувна попладнево во катедралата Нотр Дам во центарот на Париз, соопштија градските власти. Сликите објавени на социјалните медиуми покажуваат пламени и облаци од чад над покривот на средновековната катедрала, која е воедно најпосетениот историски споменик во Европа. Причината засега не е позната, но се верува дека пожарот е поврзан со реновирањето на катедралата. Во тек е голема операција за гаснење на пожарот, а областа околу катедралата во центарот на Париз е обезбедена, соопштија официјални лица.

Минатата година, Католичката црква во Франција бараше итна реконструкција за спасување на катедралата, која почна да се урива.