Пристигнува 2023…

Жителите на Киритимати, атол кој припаѓа на архипелагот Кирибати, први во светот ја дочекаа новата 2023 година во 11 часот според средноевропско време.

Новата 2023 година веќе пристигна на другата страна на светот. Први ја дочекаа жителите на малиот атол Киритимати кој припаѓа на островската држава Кирибати во Тихиот океан, 13 часови пред земјите со средноевропско време. Коралниот остров Киритимати од 388 квадратни километри има само неколку илјади жители.

За првпат од почетокот на пандемијата на коронавирусот, и туристи можеа да присуствуваат на првиот дочек на Новата 2023 година. Границите на Полинезискиот архипелаг беа главно затворени за странци од март 2020 година. Кирибати дури во август повторно почна да пречекува меѓународни гости. Кирибати се сместени во централниот дел на Тихиот океан околу 4.000 километри југозападно од Хаваи.

Република Кирибати е островска држава чии 33 атоли – корални острови, се простираат на над 1.351.000 километри квадратни во пределот околу екваторот. Државата припаѓа на земјите од Комонвелтот и има околу 103.000 жители кои се населени на 21 остров.

Традиционалниот новогодишен огномет во Сиднеј
Традиционалниот новогодишен огномет во Сиднеј

Еден час по Кирибати, новата година ја дочекаа жителите на Самоа и Нов Зеланд а следуваат Австралија, Јапонија, Индонезија, Кина, Индија и други азиски земји, потоа Европа и Африка, а потоа и двата американски континенти.

„Целиот круг“ завршува  на Пацификот – Хаваи, Американска Самоа и островите Мидвеј ќе бидат последни кои ќе ја пречекаат 2023 година.

Кинезите, за разлика од другите жители на земјината топка, се прилично рамнодушни кон дочекот на 1 јануари, бидејќи имаат своја Нова година, која ја слават 15 дена. Првиот ден од кинеската Нова година започнува на младата месечина, која се јавува помеѓу 21 јануари и 20 февруари.

Извор: DW

Прочитајте повеќе

Повеќе од милион луѓе во 2023 година барале азил во Европа

Во бројките на Агенцијата за азил на Европската комисија не се вклучени 4,4 милиони Украинци …