Русија не сопира со агресијата, истрелани ракети и дронови кон Украина

Руската воена агресија врз Украина продолжи и изминатово деноноќие, при што во изминатава ноќ се истрелани пет ракети и 12 камикази-дронови, објавија украинските воздушни сили, пренесува весникот Гардијан. 

Противвоздушната одбрана на Украина соборила две руски ракети, кои таргетирале цели во северните и источните делови на Украина. Дроновите биле лансирани на различни локации, со фокус на западниот дел на Украина.

Гувернерот на источниот регион Полтава, Филип Пронин изјави дека биле нападнати населени места со дронови и ракети, при што три цивили биле повредени и хоспитализирани во болница.

Исто така, Русија продоллжи со артилерија да ги напаѓа населените места во Украина што се во близина на фронтот во регионите Херсон, Запорижја и Донецк. Една жена била повредена во артилериските напади кои оштетиле згради и инфраструктура во регионот Запорижја.

Руските сили во изминатиов период се обидоа преку офанзива да го заземат градот Авдивка во близина на Донецк. Украинската војска соопшти дека руската офанзива пропаднала. Русија сега се обидува да доведе нови сили за да го опкружат градот Авдивка, изјави украинскиот командант Виталиј Барабаш. Официјална Москва не негира дека започна нова руска офанзива во Донецкиот регион, но и информациите од руските медиуми засега не говорат за окупација на нови населени места во овој регион.

Украинскиот претседател Володимир Зеленски им се заблагодари на војниците кои се борат и ги држат позициите, особено во населените места Авдивка, Марјинка и други клучни локации во Донецкиот регион.

Извор: МЕТА