Спасовски

Спасовски за српска „Политика”: Инцидентите на Косово го засегаат целиот регион, а безбедносната состојба во Република Северна Македонија е под контрола

Во интервју за српска „Политика“ Спасовски вели дека e уверен оти стратешките партнери ЕУ и САД нема да дозволат црни сценарија и ќе извршат силен притисок за да се вратат работите во нормала

Министерот за внатрешни работи Оливер Спасовски, одговарајќи на прашање за безбедносната состојба во Република Северна Македонија по настаните во Косово, за српска „Политика” истакна дека безбедносната состојба е под контрола, но дека инцидентите го засегаат целиот регион.

„Инцидентите на северот од Косово секако дека го засегаат соседството, односно целиот регион, но безбедносните служби будно ја следат ситуацијата, собираат информации и се прави редовна анализа. Засега безбедносната ситуација во државата е под контрола, нема директни рефлексии кои би претставувале опасност за безбедноста на Македонија и граѓаните можат да бидат спокојни”, изјави министерот Спасовски. Притоа, тој ја изрази увереноста дека стратешките партнери ЕУ и САД нема да дозволат црни сценарија и ќе извршат силен притисок за да се вратат работите во нормала.

„Ако нашата заедничка цел е да станеме регион кој ќе извезува мир и стабилност, тогаш не може политички кризи да се решаваат со конфликти, односно мора да се обединиме со заеднички политики кои можеме заеднички да ја спроведуваме. Ако сакаме напредок, економски развој и подобар стандард за нашите граѓани, во ништо од тоа нема да успееме без безбедноста”, истакна Спасовски. Притоа, тој посочи дека е повеќе од потребна позитивна разрешница во односите меѓу Србија и Косово.

„Затоа и сметам дека позитивниот исход во односите помеѓу Србија и Косово може да изврши пресудно влијание во целиот регион, а лично посакувам сите случувања во нашето соседство да се решат преку дијалог и на мирен начин, бидејќи што побрзото решавање на обврските и очекувањата, без разлика колку се тешки или комплексни, ќе значи поскоро навраќање на теми кои се од интерес на нашите граѓани и значат подобар живот за нив. Конечно , сите имаме единствена цел – заеднички да бидеме дел од европското семејство, да ги имплементираме европските вредности и на граѓаните да им овозможиме повисоки животни стандарди”, подвлече министерот Спасовски.

Прочитајте повеќе

Полициска акција во затворот Идризово

Полициска акција во затворот Идризово

Во најголемиот затвор ,,Идризово” во Скопје, денеска биле извршени претреси. Од обвинителството ја потврдуваат акцијата, …