Генералниот секретар на НАТО ќе се сретне со шефот на државата Стево Пендаровски, со премиерот Димитар Ковачевски, собранискиот претседател Талат Џафери, а ќе се обрати и пред пратениците во Собранието
Генералниот секретар на НАТО, Јенс Столтенберг во вторник ќе допатува во дводневна посета на Скопје. Тој ќе се сретне со шефот на државата Стево Пендаровски и со собранискиот претседател Талат Џафери, а ќе се обрати и пред пратениците во Собранието.
Македонија ќе биде домаќин на неформалниот состанок на лидери на НАТО сојузници од регионот во Скопје, на 22 ноември 2023, в среда. Генералниот секретар на НАТО Столтенберг и премиерот Димитар Ковачевски ќе ги пречекаат поканетите лидери од Република Албанија – премиерот Еди Рама, Република Хрватска – претседателот Зоран Милановиќ, Република Црна Гора – премиерот Милојко Спајиќ и Република Словенија – премиерот Роберт Голоб.
Столтенберг пристигнува во Скопје во рамки на неговата неколкудневна турнеја низ земјите во Западниот Балкан.
Западнобалканската турнеја Столтенберг ќе ја започне в недела попладне со посета на Сараево, каде ќе има работна вечера со членовите на Претседателството на Босна и Херцеговина.
ПУБЛИКУМ Вистината на прво место
