Сите јавни набавки се блокирани бидејќи веќе трет ден по ред веб-страницата на Бирото за јавни набавки (https://e-nabavki.gov.mk/) не е во функција.
На нефункционалната веб-страница, Бирото за јавни набавки објави порака дека сервисот е привремено недостапен поради „сериозни технички проблеми со инфраструктурата“.
Наведено е и дека по надминување на проблемот јавноста ќе биде известена, а и сите тендерски рокови (јавни отворања/крајни рокови/аукции) ќе бидат продолжени соодветно, согласно со Правилникот за начинот на користење на Електронскиот систем за јавни набавки (Сл.Весник на РСМ бр. 64/19 и 271/19).
За сега, не може да се добие информација дали станува збор за хакерски напад и дали базата на податоци за склучени договори на јавните институции е загрозена.
„Во моментов имаме технички проблем. Работиме на отстранување на проблемот. Моментално јавни набавки не може да се спроведуваат. Се надевам дека веб-сајтот брзо ќе биде во функција. Ќе следува официјално соопштение од кога ќе продолжат јавните набавки“, рече Боре Хаџиев, директор на БЈН во изјава за порталот СДК.