Велика Британија: Сунак најави избори на 4 јули

Британскиот премиер Риши Сунак во средата (22 мај, 2024) соопшти дека парламентарните избори ќе се одржат на 4 јули, порано од очекуваното, а по 14 години конзервативно владеење, речиси е сигурно дека ќе победи Лабуристичката партија.

Завршувајќи ги повеќемесечните шпекулации за тоа кога ќе ги распише изборите, 44-годишниот Сунак објави пред неговата канцеларија во Даунинг стрит дека изборите ќе се одржат на почетокот на јули, што може да се покаже како ризична стратегија со оглед на тоа што неговата партија во анкетите заостанува зад лабуристите.

„Сега е момент Британија да ја избере својата иднина. Ќе имаме општи избори на 4 јули“, рече Риши Сунак.

Не само што Сунак тргнува во изборите со големо заостанување во анкетите зад лабуристите, туку тој е речиси изолиран од дел од неговата партија и се повеќе зависи од мал тим советници кои ќе го водат во она што може да биде немилосрдна кампања.

Тој, сепак, оцени дека ризикот вреди со оглед на некои позитивни економски трендови, како што се падот на инфлацијата и најбрзиот економски раст во последните три години. Токму оваа агенда ќе ја претстави пред гласачите во борбата за нов мандат.

Поранешниот инвестициски банкар и министер за финансии пред нешто помалку од две години седна во премиерската фотелја и оттогаш не успеа јасно да дефинира за што се залага. Во исто време, тој е се повеќе фрустриран бидејќи, како што тој гледа, неговите успеси не се ценат.

Двете партии, кога е во прашање кампањата, цврсто се на стартните позиции од кои влегуваат во судир, пред се на економски и одбранбен план.

Ако лабуристите победат, Британија, некогаш позната по својата политичка стабилност, ќе има шест премиери за осум години, што е првпат од 1830-тите години.