Владата ги усвои предложените измени на Законот за спорт, ќе се носат по скратена постапка

Владата на вчерашната седница го усвои Предлог законот за изменување и дополнување на Законот за спорт што беше предложен од Министерството за правда.

Со предложените измени се обезбедуваат финансиски поттикнувања за националните спортски федерации, спортските клубови, активни спортисти од олимписки и неолимписки спортови и други правни субјекти кои имаат решение за вршење на дејност спорт, подигнување на спортот на повисоко ниво и остварување на подобри резултати дома и на меѓународно ниво.

„Аналогно на измените и дополнувањата на Законот за данокот на добивка во делот на даночното намалување/поттикнување, во Законот за спортот се предвидува даночно поттикнување за спортските субјекти со воведување на ваучерски систем согласно кој точно ќе бидат утврдени надлежностите на спортските субјекти и органот на државната управа надлежен за работите од областа на спортот, како и самата процедура при издавање на ваучери“, велат од Министерството за правда.

Законот ќе се достави во Собранието, каде пратениците ќе го носат по скратена постапка.