Во прилепскиот регион состојбата со пожарите сеуште нестабилна

„Општинскиот кризен штаб е во постојана комуникација со Центарот за управување со кризи, Дирекцијата за заштита и спасување и со командирот на ТППЕ кој управува со сите единици со армијата, со припадниците на Македонски шуми и јавните комунални претпријатија“, истакна градоначалникот Илија Јованоски во денешната изјава за медиумите.

„Во овој момент можам да кажам дека пожарот што беше на потегот кај Топлица е локализиран и за среќа регионалниот пат Прилеп- Градско е прооден. Повремено се појавува пожар околу селата Топлица и Ракле, но теренските екипи го гаснат. Како проблем го гледам пожарот кај Смолани, каде гори нискостеблеста шума и многу блиску е до боровата шума и во зависнот од силината на ветрот, може да се случи да го зафати и тој дел. Токму затоа побаравме воздушна поддршка. Разговарав со директорот на Центарот за управување со кризи и ми беше кажано дека во овој момент не се во можност да обезбедат воздушна поддршка, од причина што заради огнената стихија, градовите Делчево и Пехчево имаат поголема потреба од воздушна поддршка“, изјави Јованоски.

Градоначалникот Јованоски посочи дека во моментот се приклучуваат и луѓе кои ќе можат да гаснат пожар со грбни пумпи, а исто така барањето упатено до Центарот за управување со кризи останува отворено.