Универзитетските собранија и „Студентски отпор“ со заеднички марш на Меѓународниот ден на студентите

По објавата на два паралелни марша што за утре ги најавија формалните студентски претставници од универзитетските студентски собранија и движењето „Студентски отпор“, двете страни вчеравечер соопштија дека сепак протестот ќе го одржат заедно по повод 17 ноември, Меѓународниот ден на студентите.

„Оваа борба е заедничка и само сплотени заедно ќе успееме да ги заштитиме нашите права и барања“, се вели во објавите на универзитетските собранија и движењето „Студентски отпор“.

Протестот ќе започне во 17 часот и 30 минути пред Владата на Република Северна Македонија од каде студентите ќе се упатат кон зградата на Министерството за образование и наука (МОН).

Студентите ќе побараат издвојување на средства од буџетот за подобри услови во студентските домови, изземање на студентите од антикризните мерки, целосно спроведување на законот за студентски оброк и зголемување на сумата, изедначување на стипендиите, подигнување на квалитетот и дигитализација на образованието.

Студентите ги повикаа и нивните професори, декани, ректори, како и средношколците да им се приклучат на маршот.

Претходно, движењето „Студентски отпор“ најави протестен марш кој требаше да почне во 17 часот пред зградата на МОН и да продолжи кон Собранието, додека универзитетските собранија повикаа на мирен марш што ќе започне во 18 часот и ќе се движи во обратен правец – од Собранието кон МОН.

Најавениот марш следува по бурата реакции што изминатиов период ги предизвика предлог-законот за субвенциониран оброк, кој предвидуваше построги критериуми за студентите и кој подоцна беше повлечен. Додека дел од студентите во понеделникот беа на средба во Собранието со пратениците, министерот за образование Јетон Шаќири и премиерот Димитар Ковачевски,  други протестираа пред законодавниот дом искажувајќи го незадоволството од моменталната ситуација во која се наоѓаат студентите во земјава.