ПУБЛИКУМ Вистината на прво место
Итни средби се одржуваат утрово во Брисел во рамки на дијалогот Косово-Србија. Средбите се на барање на Европската унија (ЕУ) поради кризата предизвикана од регистарските таблички на Косово. Борел одвоено првин се сретна со Курти, па со Вучиќ, по што има заедничка средба.
Шефот на европската дипломатија, Жозеп Борел, на 21 ноември нешто по 8 часот најпрвин се сретна со премиерот на Косово, Албин Курти. Потоа нешто по 9 часот почна средбата и со претседателот на Србија, Александар Вучиќ.
По одвоените средби започна и заедничка, таканаречена трилатерална средба меѓу ЕУ, Србија и Косово, а европската страна на средбата покрај Борел ја претставува и Мирослав Лајчак, специјалниот претставник на ЕУ за дијалог меѓу Белград и Приштина.
„Итна средба“ во услови на „најсериозна криза од 2013 година“
Во соопштението, ЕУ оцени дека станува збор за „итен состанок“, среде кризата предизвикана од регистарските таблички издадени од српските власти, кои косовската страна ги смета за незаконски.
Косовските власти најавија дека од 21 ноември ќе почнат да наплатуваат казни од 150 евра за возачите кои не ги пререгистрирале возилата на табличките РКС (Република Косово). Но, косовската полиција во неделата најави дека од вторник, 22 ноември, ќе почне со изрекување на казните.
Европската унија смета дека ова е „најсериозната криза од 2013 година“.
Шефот на европската дипломатија Борел пред средбата во објава на Твитер напиша дека закажал „итна средба“ со Вучиќ и Курти.
„Потребна ни е деескалација на ситуацијата, (неопходно е) да престанеме да управуваме со постојаните кризи и наместо тоа да постигнеме напредок во нормализацијата на односите“, напиша Борел на Твитер на 20 ноември.
Српскиот претседател Александар Вучиќ ден пред средбата изјави дека не е оптимист за разговорите во Брисел.
„Ќе одам во Брисел. Мислам дека не можеме ништо, но одам за да не дадам доволна причина Србија да биде обвинета дека не сака да направи ништо“, рече Вучиќ во гостувањето на „Прва“. телевизија на 20 ноември.
Во соопштението на прес-службата на ЕУ се оценува дека целата на состанокот е да се најде решение за тензиите меѓу Србија и Косово.
„Во фокусот на итниот состанок ќе биде изнаоѓањето излез од актуелната криза и избегнување на каква било понатамошна ескалација и тензии на терен, со акцент на регистарските таблички и враќањето на косовските Срби во косовските институции“, се вели во соопштението на ЕУ од 20 ноември.
САД се надеваат на договор меѓу Србија и Косово
Американскиот Стејт департмент во неделата на 20 ноември објави дека Соединетите Американски Држави (САД) се надеваат дека Србија и Косово ќе постигнат договор „во наредните денови со поддршка на специјалниот претставник на Европската унија (ЕУ)“.
Ситуацијата уште повеќе се искомплицира откако на 5 ноември припадниците на српската заедница на север ги напуштија косовските институции, противејќи се на одлуката на Владата на Косово за пререгистрација на возилата.
Овие таблички се нелегални за Косово, но досега се толерирани во четири општини со српско мнозинство на север: Северна Митровица, Лепосавиќ, Звечан и Зубин Поток.
Во рамките на дијалогот, Косово и Србија постигнаа договор за слобода на движење во 2011 и 2016 година, кој вклучуваше пререгистрација на регистарските таблички од српски во косовски.
Иако ја оценија одлуката за спроведување на договорот за легитимна, претставниците на меѓународната заедница побараа од официјална Приштина да го одложи спроведувањето за десет месеци, што косовските власти го одбија.
Разочарување од оваа постапка изразија и претставниците на ЕУ и Соединетите Американски Држави.
Извор: Радио Слободна Европа
