Германија ја менува мигрантската политика, Шолц ги заостри правата

Побрзо процесуирање на барањата за азил во Германија, намалување на социјалните бенефиции, промена на начинот за грижа за мигрантите покрај веќе заострените гранични контроли со соседите се најновите мерки што ги договорија канцеларот Олаф Шолц со водечките германски политичари, а кои наидуваат на различни реакции во германското општество, пишува германската новинска агенција ДПА.

Членовите на централно-левичарската коалиција на Шолц го поздравија договорот за миграција и азил во Германија, опишувајќи го како голема пресвртница, додека конзервативната десница го опиша договорот како мал чекор во вистинска насока.

Политичарите предводени од Шолц имаат генерален договор дека Германија треба да изврши притисок врз Европската унија да размисли мигрантите да поднесуваат барања за азил од трети земји надвор од блокот. Преговорите се одвиваа во Берлин и траеја до раните утрински часови во вторникот.

И покрај постигнатиот компромис меѓу политичарите од владејачката коалиција, левичарската младинска организација на Зелените, сепак, го осуди договорот како „погрешен и откривачки“.

„Планираното заострување на законите за азил е катастрофа и е во согласност со промената надесно во миграциската политика“, изјави за ДПА Катарина Стола, ко-водач на младинската организација на Зелените.

Извор: МЕТА