Каховка: Десетици илјади луѓе без вода за пиење

Каховка: Десетици илјади луѓе без вода за пиење

По експлозијата на браната Каховка, десетици илјади луѓе во јужна Украина се без вода за пиење. Претседателот Зеленски предупредува од катастрофа за животната средина и земјоделството. НАТО закажа итен состанок.

По оштетувањето на браната Каховка расте загриженоста од последиците за населението во јужна Украина. Украинските власти вчера (7.06) испратија спасувачи кои треба да им помогнат на стотици луѓе заглавени на покривите и треба да донесат вода за пиење во поплавените подрачја.

Претседателот Володимир Зеленски, кој одржа средба со надлежните власти за натамошните чекори, предупреди од еколошка катастрофа. Во видео објавено на Јутјуб, Зеленски вели дека е невозможно да се предвиди колку од хемикалиите и нафтените продукти складирани во поплавените области ќе завршат во реките и морето.

Експерти: Уништувањето ќе „избрише цели заедници“

Украинското Министерство за земјоделство е исто така во состојба на аларм: „Нивите во јужна Украина следната година може да се претворат во пустини“, се вели оттаму.

Браната и акумулацијата Каховка беа критични за снабдувањето со слатка вода и за наводнување на јужна Украина. Веќе сега е јасно дека десетици илјади луѓе се останати без вода за пиење, посевите се уништени и се наѕира долгорочен недостиг на електрична енергија. Уништувањето „ќе резултира со трајно оштетување на земјоделството и снабдувањето со вода за пиење“ и „ќе избрише цели заедници“, изјави за PBS NewsHour аналитичарот Мајкл Кофман од  американската истражувачка група Центар за поморски анализи.

Украина Херсон поплави
Спасувачи евакуираат постара жена од поплавен дел од градот Херсон

Руските војници побегнале по пробивањето на браната

Во градот Олешки, контролиран од Москва, 19-годишната Лера за новинската агенција АП изјави дека првиот кат од нејзиниот дом е поплавен. „Сè околу нас плива. Луѓето стојат на покривите и бараат помош, но никој не ги евакуира“, раскажува Лера, која не сака да го каже своето презиме поради страв од репресалии.

Повеќето руски војници побегнале од Олешки веднаш по пробивот на браната, вели Лера. Сепак, како што додава таа, сѐ уште постои еден воен контролен пункт. Чамците со луѓе кои се обидуваа да го напуштат градот, тврди девојката, се нашле под оган на војниците. Нејзините изјави немаат потврда од независен извор.

Украина поплави Нова Каховка
Поплави во Нова Каховка по пробивањето на браната

Генералниот секретар на НАТО претседава со кризен состанок

Генералниот секретар на НАТО, Јенс Столтенберг, за денеска најави итен состанок со Украина во врска со „срамното уништување“ на браната Каховка. Инцидентот „протера илјадници луѓе и предизвика еколошка катастрофа во Украина“, објави Столтенберг на Твитер.

Украинскиот министер за надворешни работи Дмитро Кулеба ќе учествува на состанокот на Комисијата НАТО-Украина преку видео врска. НАТО не даде дополнителни информации за средбата. Кулеба на Твитер напиша дека средбата се одржува на негово барање. Столтенберг вети дека „механизмите на НАТО ќе се користат за давање хуманитарна помош“.

Шефот на украинската дипломатија повтори дека „кризата“ е предизвикана од „руското уништување на браната Каховка“. Украина и Русија меѓусебно се обвинуваат за експлозијата што делумно ја уништи браната на реката Дњепар пред два дена. Огромни количества вода поплавија големи области на јужна Украина. Илјадници луѓе се веќе евакуирани, а расте и загриженоста од еколошка катастрофа.

Прочитајте повеќе

Затвореници во руски притвор земале двајца вработени како заложници, бараат автомобил и бесплатен премин

Затвореници во руски притвор земале двајца вработени како заложници, бараат автомобил и бесплатен премин

Шест затвореници во притворен центар во руската област Ростов зеле како заложници двајца вработени во …