косово

Курти денеска на средба со Лајчак и Ескобар, протестите во Северно Косово продолжуваат

Косовскиот премиер Албин Курти вечерва ќе се сретне со специјалниот претставник на Европската унија за дијалогот меѓу Косово и Србија Мирослав Лајчак и со заменик помошникот на државниот секретар на САД за европски и евроазиски прашања и специјален претставник за Западен Балкан, Габриел Ескобар

Припадниците на српската заедница во северно Косово веќе десетти ден протестираат пред општинските згради. КФОР се наоѓа во непосредна близина, а српската заедница поддржана од официјален Белград бара новоизбраните градоначалници на општините од северно Косово да не влезат во административните згради, пренесува Радио-телевизија Србија.

Косовскиот премиер Албин Курти вечерва ќе се сретне со специјалниот претставник на Европската Унија за дијалогот меѓу Косово и Србија, Мирослав Лајчак и со заменик помошникот на државниот секретар на САД за европски и евроазиски прашања и специјален претставник за Западен Балкан, Габриел Ескобар, пренесува Радио-телевизија Косово.

Од косовската влада информираат дека средбата во Приштина ќе се одржи од 20 часот. Лајчак и Ескобар веќе беше најавено дека за време на посетата на Косово и Србија ќе ги повикаат сите страни да преземат чекори за деескалација на состојбата во Северно Косово.

Западните дипломати продолжуваат да ги повикуваат Косово и Србија да се заложат за воспоставување на мир во општините Звечан, Зубин Поток, Лепосавиќ и северниот дел на Митровица.

Европската Унија и САД веќе побараа од косовските власти да организираат нови локални избори во Северно Косово на кои ќе учествуваат и Србите и да се формира Заедницатa на српски општини.

Американските власти го повикаa Белград да ги повлече српските сили распоредени во близина на административната линија и да го намали нивото на борбена готовност, а Приштина да им дозволи на новоизбраните претседатели на општините од Северно Косово да ги извршуваат своите должности од алтернативни локации и да ги повлече полициските сили од пред општинските згради.

Извор:МЕТА

Прочитајте повеќе

Дали по заканите за „Голема Србија“ наскоро ќе следат дела?

Дали по заканите за „Голема Србија“ наскоро ќе следат дела?

Србија и босанските Срби сè поотворено се стремат кон заедничка држава и го продлабочуваат сојузот …