ПУБЛИКУМ Вистината на прво место
Балканскиот натпревар Back to Belgrade 2021 донесе голем успех за македонските натпреварувачи во кјубинг, информираат од Македонската Кјубинг Асоцијација. Александар Арсовски го постави новиот македонски рекорд 2:08.53 во решавање на Рубиковата коцка без гледање (3×3 Blindfolded) и воедно го освои второто место на балканскиот натпревар.
На натпреварот во Белград, Ѓорѓи Чешмеџиевски успеа да сруши 13 национални рекорди (3×3 Single, 3×3 Average, 4×4 Single, 4×4 Average, Skewb, 5×5 Single, 5×5 Mean, 6×6 Single, 6×6 Mean, Pyraminx, Megaminx, 7×7, 7×7 Average) и да освои два златни и три бронзени медали во конкуренција со едни од најдобрите кјубери во Европа и светот.
Back to Belgrade 2021 се одржа на 10 и 11 јули во српскиот главен град, додека лимитот на учесници беше ограничен на само 30 натпреварувачи од осум земји. На натпреварот во Белград учествуваше и светскиот рекордер во 4×4, Себастијан Вејер.
Македонската Кјубинг Асоцијација е основана во август 2018 година, а големиот интерес за редење на Рубиковата коцка во земјава доведе до успесите со освоени медали и поставените национални рекорди.
