Пендаровски: Да се расветли случајот М-НАВ, станува збор за потенцијално загрозување на безбедноста во авионскиот сообраќај

Претседателот Стево Пендаровски денеска ги прими Александар Тасевски, претседател на Струковиот синдикат на контролори на летање и Горан Гавровски, член на синдикалниот одбор, информираат од претседателскиот кабинет.

На средбата претседателот Пендаровски ги поддржал заложбите на синдикатот за одржување на професионалното ниво во функционирањето на М-НАВ АД – Скопје, којашто е дел од критичната инфраструктура во државата.

„Во оваа насока, претседателот Пендаровски уште еднаш го осуди насилничкото однесување во М-НАВ од страна на вработени во таа институција и други лица кои неовластено влегле во нивните простории и повика на расчистување на случувањата во најкус можен рок, имајќи предвид дека станува збор за потенцијално загрозување на безбедноста во меѓународниот авионски сообраќај“, велат од кабинетот на Пендаровски.

Претседателот го реафирмирал ставот дека ничиј личен или политички интерес не може да биде над правниот поредок и непреченото функционирање на институциите.

Во меѓувреме, за М-НАВ се огласи и Судскиот совет, по бурата реакции откако обвинителството побара притвор за инволвираните во упадот во М-НАВ, каде беа нападнати вработени, а меѓу осомничените е и Беким Незири, член на ДУИ кој во минатото беше на високи позиции во Македонија. Од Судскиот совет се оградуваат и велат дека судиите се независни во постапувањето и одлучувањето.

„Во врска со последните реакции на јавноста за случајот М-НАВ, Судскиот совет ја известува јавноста дека судовите се независни во своето постапување и одлучување, а Судскиот совет во рамките на своите законски надлежности ја следи работата на судовите“, велат од Судски совет.

Денеска на владина седница треба да се решава за разрешувањето на раководството на Македонска навигација и барањето за целосна ревизија на досегашното работење на М-НАВ. Ако нема разрешување, Синдикатот од утре најави затворање на македонското небо.