За злосторничко здружување, злоупотреба на службена положба и овластување и примање награда за противзаконито дејание, на поранешниот директор на УБК Сашо Мијалков денеска му беше досудена затворска казна од 12 години во случајот Таргет-Тврдина кој се однесува на незаконското прислушување на 20.000 граѓани од 2008 до 2015 година во време на владеењто на ВМРО-ДПМНЕ. На Мијалков во затворската казна му се засметува и времето поминато во притвор и куќен притвор за време на судскиот процес.

На поранешната министерка за внатрешни работи, Гордана Јанкуловска судот ѝ пресуди казна затвор од 4 години за злоупотреба на службена положба и овластување. Никола Бошкоски и Горан Грујевски добија единствена казна затвор од по 15 години. Тони Јакимовски е осуден на казна затвор од 6 години. На Надица Николиќ и е изречена казна затвор од 3 години.

Другите пет вработени во УБК се осудени на условна затворска казна од 2 години, која нема да ја отслужат под услов да не сторат ново кривично дело во рок од 5 години. Судот цени дека овие обвинети лица работеле во пониските структури и работеле според хиерархиската поставеност.

Судот воедно пресуди обвинетите лица солидарно да ја надоместат штетата предизвикана од уништувањето на опремата за прислушкување на УБК во вредност од над 87 милиони денари, и тоа во рок од 3 месеци.

Одлуката ја донесе донесе петчлениот судечкиот совет во состав од Џенета Бектовиќ како прв судија, Владимир Туфегџиќ како втор и тројца поротници.

Пресудата е првостепена и странките (обвинителството и одбраната) имаат право на жалба до Апелацискиот суд во Скопје.

Во судскиот процес биле сослушани 123 сведоци, биле поднесени 887 материјални докази и биле организирани 5 вештачења.

Извор:МЕТА