Прорускиот политичар Александар Вулин даде оставка од директорската позиција во БИА

Еден од главните руски играчи во Србија, директорот на Безбедносната информативна агенција (БИА) Александар Вулин денеска поднесе оставка од функцијата, пренесува весникот Данас. Оставката доаѓа по речиси 11 месеци откако беше именуван на оваа функција од страна на актуелната српска власт.

Во текот на неколкумесечното раководење со моќната БИА, во септември се случи вооружениот инцидент кај селото Бањска во северно Косово, каде што загинаа еден косовски полицаец и тројца напаѓачи. Косовските власти тогаш обвинија дека Србија е директно поврзана со вооружување на групата предводена од Милан Радојчиќ. Само неколку месеци претходно, САД во јули 2023 година го впишаа Александар Вулин на црната листа поради криминал, нелегални операции со наркотици и злоупотреби на јавната функција.

БИРН ОТКРИВА: ЗАПЛЕНЕТОТО ОРУЖЈЕ КАЈ БАЊСКА ПОМИНАЛО НИЗ РАЦЕТЕ НА СРПСКАТА ДРЖАВА

АЛЕКСАНДАР ВУЛИН НА „ЦРНАТА ЛИСТА“ НА САД ПОРАДИ КРИМИНАЛ, НЕЛЕГАЛНИ ОПЕРАЦИИ СО НАРКОТИЦИ И ЗЛОУПОТРЕБИ

Вулин во денешната оставка што ја поднесе од директорската функција на БИА вели дека САД и ЕУ ја барале неговата глава за да не бидат воведени санкции кон Србија. Тој тврди дека српскиот претседател Александар Вучиќ се соочувал со закани и уцени, кои можело да се споредуваат само со „австроунгарскиот ултиматум од 1914 година“, пишува Вулин.

Александар Вулин на крајот се заблагодари на претседателот Вучиќ поради тоа што „ја бранел Србија“.

„Го молам да остане претседател на сите Срби, последниот слободен водач во Европа, во чест на сите Срби. Се надевам дека и на овие избори ќе одиме заедно да ја водиме борбата за слободна Европа“, напиша во оставката Александар Вулин.

Извор: МЕТА