Протести во Холандија по победата на Вилдерс

По победата на деснопопулистичката партија на Герт Вилдерс на парламентарните избори во Холандија, на протести излегоа стотици луѓе. Во Утрехт околу илјада луѓе го следеа повикот на неколку левичарски партии за демонстрации под мотото „Не сте сами“. Сличен протестен марш се одржа и во Амстердам. Организаторите на демонстрациите во Утрехт велат: „Сакаме да им покажеме на Холанѓаните дека никогаш никого не оставаме сам и дека се залагаме за правата на сите“.

ПВВ сака да ги депортира Сиријците

Џуди Карајоли, сириска студентка по новинарство, за агенцијата АФП на протестите изјави дека изборниот успех на Вилдерс ѝ предизвикува „голем страв“. Партијата за слобода (ПВВ) е отворено расистичка партија, вели таа, додавајќи дека многу нејзини пријатели се бегалци со дозволи за престој кои сега се плашат за својата иднина. Во својата програма, ПВВ, меѓу другото, бара да се укинат дозволите за престој на сириските бегалци бидејќи делови од Сирија сега биле „безбедни“. Хаамед Хасан, софтверски инженер од Египет, вели дека го плаши тоа што една партија се обидува да ја направи Холандија „помалку безбедна, а не побезбедна“.

Тешко формирање влада

На парламентарните избори во средата (22.11) партијата ПВВ на Герт Вилдерс освои 37 од 150 пратенички места и со тоа стана најсилна партија во парламентот. Земјата сега најверојатно ќе се соочи со комплициран процес на формирање влада бидејќи можните коалициски партнери на Вилдерс досега ја исклучуваа можноста да станат негови јуниор-партнери. За време на холандската изборна кампања, Вилдерс се обиде да одржи релативно умерен имиџ. Во изборната програма на неговата ПВВ, на барателите на азил, меѓу другото, им се подметнува дека се „гостат“ бесплатно, додека холандските семејства требало да штедат на храна. ПВВ исто така бара забрана на исламските училишта, Куранот и џамиите, како и забрана за носење шамии во владините објекти. Партијата на Вилдерс има за цел да одржи „задолжителен референдум“ за излегување на Холандија од ЕУ.