Седниците на Совет на општина Крушево ќе се пренесуваат во живо на Фејсбук и Јутјуб

Започна опремувањето на просторијата на Советот на општина Крушево со опрема која ќе овозможи пренесување на седниците во живо на „Фејсбук“ и „Јутјуб“. Се очекува веќе од наредниот месец седниците на општинскиот Совет да се одржуваат во просторија во горната училишна зграда и да се пренесуваат во живо.

„Конечно дојдовме до имплементација на иновативната алатка за пренесување на седниците на Советот во живо и со тоа го подигнуваме нивото на транспарентност на Советот. Граѓаните ќе имаат можност да ги следат седниците во живо, да ги прегледуваат по завршувањето и со тоа одблиску да се запознаат со нашата работа. Се заблагодарувам на Швајцарската агенција за развој и соработка, УНДП како имплементатор и на сите советници кои зедоа учество во проектот. Работата на Советот станува поотворена, а советниците се’ поблиски до граѓаните“, изјави претседателот на Советот на општина Крушево, Тома Петроски.

Во рамки на овој проект, советниците посетуваа обуки за градење на капацитетите и се здобија со знаења за подобро и поефикасно извршување на обврските.