Соработка на Владата и Општина Кавадарци за намалување на загадувањето и обезбедување здрава животна средина

Заменик министерот за животна средина и просторно планирање, Јани Макрадули вчера оствари работна средба со градоначалникот на општина Кавадарци, Митко Јанчев. На средбата се разговараше за поддршката што општината ја доби од програмата на МЖСПП за намалување на загадувањето, како и за промена на стари врати и прозорци за енергетски ефикасни објекти на дел од општинските и подрачните училишта.

„Ме радува што заеднички соработуваме во зачувувањето на здравата животна средина, но и намалувањето на аерозагадувањето, како еден од најголемите предизвици што постои во нашата земја.  Денеска во рамки на имплементацијата на Планот за чист воздух на Владата, заедно со градоначалникот на општина Кавадарци посетивме дел од училиштата каде се врши замена на загадувачките системи за затоплување со еколошки, како и на објектите каде е предвидена замена на старите прозорци и врати, со цел подобрување на енергетската ефикасност. Она што сакам да го нагласам, е дека ова не само што е добро за децата кои учат таму, туку тоа значи и заштеда на пари“, рече Макрадули.

Заменик министерот за животна средина и просторно планирање и градоначалникот на општина Кавадарци направија обиколка на објектите кај кои веќе се спроведуваат активности за енергетската ефикасност, во вкупна вредност од 1,8 милиони денари и тоа во основните училишта „Страшо Пинџур” во Возарци, „Страшо Пинџур” во Дреново, „Тоше Велков Пепето” во Кавадарци, потоа во ЕМУЦ „Киро Спанџов“ во Кавадарци и во ученичкиот дом во Дреново.

Како дел од мерките од Планот за чист воздух, ќе бидат заменети нееколошките системи за греење во ОУ „Димката Ангелов – Габерот“ и во детската градинка „Рада Поцева” во Кавадарци, интервенции за кои се издвоени 5,2 милиони денари.

„Во една заедничка борба, ќе успееме да се справиме со предизвиците за заштита на животната средина. Успехот зависи од интегрирана и координирана акција на сите чинители, на централната и локалната власт, деловната заедница и граѓанските здруженија“, истакна заменик министерот Макрадули.