ПУБЛИКУМ Вистината на прво место
Владата на Србија денеска ќе одржи седница на која се очекува да се разговара за прашањето за Косово. На покана на премиерката Ана Брнабиќ, на седницата ќе присуствува и српскиот претседател Александар Вучиќ. Тој треба да ја извести владата за преговорите со високата западна делегација. Состанокот со „западната петорка“ (ЕК, САД, Франција, Германија и Италија) Вучиќ го одржа во петокот на кој, како што претходно јавија српските медиуми, се разговарало за таканаречениот француско-германски план за затворање на отворените прашања со Косово.
Вучиќ: Србија е подготвена на спроведување на европскиот план за нормализација на односите со Косово
Овој состанок, Вучиќ го опиша како еден од најтешките денови за Србија, најави консултации и побара единство. „Тоа беше еден од најтешките денови за Србија и никогаш не сум скрил од луѓето кога се случуваат вакви работи. Ќе има многу тешкотии и проблеми со кои ќе се соочиме во иднина и затоа ни е потребно единство“, рече Вучиќ. По седницата на Владата, според најавите, тој ќе има обраќање и до нацијата. Претходно, претседателот на Извршниот одбор на Српската напредна партија (СНС), Дарко Глишиќ синоќа изјави дека доколку претседателот на Србија, Александар Вучиќ, стои на ставот и поднесе оставка, тоа ќе е крај на СНС. Медиумите претходно објавија дека на средбата во седиштето на СНС имало несогласувања и повици да се отфрлат преговорите со САД и ЕУ за Косово. Според информациите, Вучиќ реагирал на овие несогласувања и рекол дека ако некој мисли дека може да ја води државата подобро од него, тој е подготвен да им го остави тоа на нив, а потоа ја напуштил средбата.
Извор: Радио Слободна Европа
