Супербоул: Канзас Сити ја одбрани титулата во НФЛ

Екипата на Канзас Сити Чифс ја одбрани шампионската титула во НФЛ, откако ноќеска во Лас Вегас го победи Сан Франциско после продолженија со 25:22. Чифси триумфираа со тачдаун на Мекол Хардман по додавање на Патрик Махомс. Ова за нив е четврто славје во Супербоул спектаклите, трето во последните пет години.

Махомс по третпат во кариерата го понесе признанието за најкорисен играч во Супербоулот и по третпат во кариерата го освои и трофејот Ломбарди. Тој е само шести квотербек во историјата на НФЛ со повеќе од три шампионски титули. Енди Рид, пак, стана петти тренер кој три или повеќе пати предводел екипа до титулата.

Канзас Сити е првата екипа која успеала да ја одбрани титулата во НФЛ по Њу Ингланд Патроитс во 2003 и во 2004 година. Тимот на Сан Франциско, пак, остана на петте титули. Последната ја освои во 1995 година и оттогаш беше три пати поразен во финалните натпревари.